لو اتحرر ضدك محضر مخالفة في شقة الإسكان الاجتماعي، متفتكرش إن خلاص الشقة راحت منك. صندوق الإسكان الاجتماعي أتاح فرصة للتصالح في بعض الحالات، زي تأجير الشقة، أو تغيير نشاطها، أو بعض المخالفات اللي يثبتها التفتيش، قبل تنفيذ قرار سحب الوحدة بشكل نهائي.
كل اللي عليك تعمله هو تتقدم بطلب تصالح لصندوق الإسكان الاجتماعي، وبعدها تسدد الغرامة المالية المقررة، وتستكمل الإجراءات المطلوبة خلال المدة المحددة.
وبعد مراجعة الطلب، بيتم إخطارك باستكمال باقي الخطوات إذا تم قبول التصالح مبدئيًا.
لكن خلي بالك.. التصالح مش معناه إن كل المخالفات هتتقبل، لأن كل حالة بيتم فحصها وفقًا للقواعد المعمول بيها، وفي مخالفات ممكن يترتب عليها سحب الوحدة إذا لم يتم تصحيح الوضع.
لو عندك شقة إسكان اجتماعي، بلاش تستنى لحد ما الإجراءات تكبر.. تابع موقفك القانوني أول بأول، والتزم بشروط التعاقد علشان تحافظ على وحدتك.
